الٓمّٓرٰ تِلْكَ اٰيٰتُ الْكِتٰبِ وَالَّذِيْ٘ اُنْزِلَ اِلَيْكَ مِنْ رَّبِّكَ الْحَقُّ وَلٰكِنَّ اَكْثَرَ النَّاسِ لَا يُؤْمِنُوْنَ
(الـمر) گۆتن ل سه‌ر ڤان حه‌رفێن كه‌ركرى ل ده‌سپێكا سووره‌تا به‌قه‌ره بۆرییه. ئه‌ڤه ئايه‌تێن قورئانا قه‌در بلنده، وئه‌ڤ قورئانا بۆ ته هاتییه خوارێ -ئه‌ى موحه‌ممه‌د- حه‌قییه، نه وه‌كى بوتپه‌رێس دبێژن: كو تو وێ ژ نك خۆ دئينى، و د گه‌ل هندێ ژى پترییا مرۆڤان باوه‌رییێ پێ نائينن وكارى پێ ناكه‌ن.
اَللّٰهُ الَّذِيْ رَفَعَ السَّمٰوٰتِ بِغَيْرِ عَمَدٍ تَرَوْنَهَا ثُمَّ اسْتَوٰي عَلَي الْعَرْشِ وَسَخَّرَ الشَّمْسَ وَالْقَمَرَ كُلٌّ يَّجْرِيْ لِاَجَلٍ مُّسَمًّي يُدَبِّرُ الْاَمْرَ يُفَصِّلُ الْاٰيٰتِ لَعَلَّكُمْ بِلِقَآءِ رَبِّكُمْ تُوْقِنُوْنَ
خودايێ پاك وبلند ئه‌وه يێ هه‌ر حه‌فت عه‌سمان ب شيانا خۆ وبێ ستوين وه‌كى هوين دبينن بلندكرين، پاشى ئه‌و ل سه‌ر عه‌رشى بلندبوو (ئستواكر) بلندبوونه‌كا بابه‌تى وى بت، ووى ڕۆژ وهه‌يڤ وه‌سا چێكرن مفايێ به‌نییان تێدا بت، هه‌ر يه‌ك ژ وان د فه‌له‌كا خۆ دا حه‌تا ڕۆژا قيامه‌تێ دزڤڕت. ئه‌و كارێ دنيايێ وئاخره‌تێ ب ڕێڤه دبه‌ت، ئه‌و وان ئايه‌تان يێن شيانا وى به‌رچاڤ دكه‌ن وهندێ دگه‌هينن كو ژ وى پێڤه‌تر چو خودايێن دى نينن بۆ هه‌وه ئاشكه‌را دكه‌ت؛ دا هوين باوه‌رییێ ب خودێ وڕۆژا قيامه‌تێ بينن، وپه‌رستنێ بۆ وى ب تنێ بكه‌ن.
وَهُوَ الَّذِيْ مَدَّ الْاَرْضَ وَجَعَلَ فِيْهَا رَوَاسِيَ وَاَنْهٰرًا وَمِنْ كُلِّ الثَّمَرٰتِ جَعَلَ فِيْهَا زَوْجَيْنِ اثْنَيْنِ يُغْشِي الَّيْلَ النَّهَارَ اِنَّ فِيْ ذٰلِكَ لَاٰيٰتٍ لِّقَوْمٍ يَّتَفَكَّرُوْنَ
وئه‌وه يێ عه‌رد به‌رفره‌هـ كرى وڕائێخستى، وبۆ ژيارا هه‌وه ئاماده‌كرى، ووى ئه‌و چيا ل عه‌ردى دانان يێن عه‌ردى ڕادگرن، ووى ئه‌و ڕويبارێن هوين ئاڤێ ژێ ڤه‌دخۆن ل عه‌ردى دانان، و ژ هه‌ر به‌رهه‌مه‌كى وى دو جۆت تێدا دانان، ڤێجا هنده‌ك يێ سپییه وهنده‌ك يێ ڕه‌شه وهنده‌ك يێ شرينه وهنده‌ك يێ ترشه، ووى شه‌ڤ ب سه‌ر ڕۆژێ دا به‌ردا دا ئه‌و وێ تارى بكه‌ت، ب ڕاستى د ڤێ هه‌مییێ دا ئايه‌ت وعيبره‌ت بۆ وى ملله‌تى هه‌نه يێ هزرا خۆ تێدا بكه‌ت، ومفاى ژێ وه‌ربگرت.
وَفِي الْاَرْضِ قِطَعٌ مُّتَجٰوِرٰتٌ وَّجَنّٰتٌ مِّنْ اَعْنَابٍ وَّزَرْعٌ وَّنَخِيْلٌ صِنْوَانٌ وَّغَيْرُ صِنْوَانٍ يُّسْقٰي بِمَآءٍ وَّاحِدٍ وَنُفَضِّلُ بَعْضَهَا عَلٰي بَعْضٍ فِي الْاُكُلِ اِنَّ فِيْ ذٰلِكَ لَاٰيٰتٍ لِّقَوْمٍ يَّعْقِلُوْنَ
و د عه‌ردى دا هنده‌ك پارچه عه‌رد هه‌نه ب ڕه‌خ يه‌ك ڤه‌نه، هنده‌ك دباشن وئه‌و تشت لێ شين دبت يێ خه‌لك مفاى بۆ خۆ ژێ ببينت، وهنده‌ك دبێ خێر وخرشن تشته‌ك لێ شين نابت، و ل عه‌ردێ باش هنده‌ك باغچه‌يێن ترى هه‌نه، وخودێ شينكاتییێ ژێك جودا ودارقه‌سپێن ل سه‌ر يه‌ك بنێ شين دبن، ويێن ل سه‌ر گه‌له‌ك بنان شين دبن يێن داين، ئه‌ڤه هه‌مى ل سه‌ر يه‌ك ئاخێ، و ب يه‌ك ئاڤێ دئێنه ئاڤدان، به‌لێ د گه‌ل هندێ ژى ڕه‌نگ وتاما وان يا ژێك جودايه، هنده‌ك يێ شرينه وهنده‌ك يێ ترشه، وهنده‌ك ژ وان بۆ خوارنێ ژ هنده‌كان چێتره، هندى د ڤێ چه‌ندێ دايه نيشان بۆ وى هه‌نه يێ دله‌ك هـه‌بـت و د فـه‌رمـانـا خودێ بگه‌هت.
وَاِنْ تَعْجَبْ فَعَجَبٌ قَوْلُهُمْ ءَاِذَا كُنَّا تُرٰبًا ءَاِنَّا لَفِيْ خَلْقٍ جَدِيْدٍ اُولٰٓئِكَ الَّذِيْنَ كَفَرُوْا بِرَبِّهِمْ وَاُولٰٓئِكَ الْاَغْلٰلُ فِيْ٘ اَعْنَاقِهِمْ وَاُولٰٓئِكَ اَصْحٰبُ النَّارِ هُمْ فِيْهَا خٰلِدُوْنَ
وئه‌گه‌ر تو -ئه‌ى موحه‌ممه‌د- ژ نه‌باوه‌رى ئينانا وان مه‌نده‌هۆش ببى پا تشتێ ژ وێ ژى عه‌جێبتر گۆتنا كافرانه ده‌مێ دبێژن: ئه‌رێ ئه‌گه‌ر ئه‌م مرين وبووينه ئاخ جاره‌كا دى دێ ڕابينه‌ڤه؟ ئه‌و ئه‌ون يێن كافرى ب وى خودايێ خۆ كرى يێ ئه‌و ژ چونه‌يێ ئافراندين، وئه‌و ئه‌ون يێن كو ل ڕۆژا قيامه‌تێ زنجير دێ دستويێن وان دا بن، وئه‌ون يێن هه‌ر دێ د ئاگرى دا بن، قه‌ت ژێ ده‌رناكه‌ڤن.
وَيَسْتَعْجِلُوْنَكَ بِالسَّيِّئَةِ قَبْلَ الْحَسَنَةِ وَقَدْ خَلَتْ مِنْ قَبْلِهِمُ الْمَثُلٰتُ وَاِنَّ رَبَّكَ لَذُوْ مَغْفِرَةٍ لِّلنَّاسِ عَلٰي ظُلْمِهِمْ وَاِنَّ رَبَّكَ لَشَدِيْدُ الْعِقَابِ
ودره‌وپێكه‌ر به‌رى له‌زا وێ باوه‌رییێ يا ته‌ناهى وباشى ب دويڤ دا دئێت له‌زێ ل وێ عه‌زابێ دكه‌ن يا من زوى ب سه‌ر وان دا نه‌ئيناى، و ب ڕاستى عه‌زابدانا دره‌وپێكه‌ران به‌رى وان بۆرییه، ڤێجا چاوا ئه‌و عيبره‌تێ بۆ خۆ ژێ ناگرن؟ وهندى خودايێ ته‌يه -ئه‌ى موحه‌ممه‌د- يێ خودان لێبۆرينه بۆ گونه‌هێن وى مرۆڤى يێ تۆبه بكه‌ت د سه‌ر زۆردارییا وى ڕا، وهندى خودايێ ته‌يه يێ عه‌زاب دژواره بۆ وى يێ ڕژدییێ ل سه‌ر كوفرێ وسه‌رداچوونێ ونه‌گوهدارییا خودێ بكه
وَيَقُوْلُ الَّذِيْنَ كَفَرُوْا لَوْلَا٘ اُنْزِلَ عَلَيْهِ اٰيَةٌ مِّنْ رَّبِّهٖ اِنَّمَا٘ اَنْتَ مُنْذِرٌ وَّلِكُلِّ قَوْمٍ هَادٍ
وكافرێن (مه‌كه‌هێ) دبێژن: پا دێ بلا موعجزه‌يه‌كا به‌رچاڤ بۆ وى هاتبا وه‌كى گۆپالێ مووساى يان حێشترا صالحى، وئه‌و چه‌نده نه ب ده‌ستێ ته‌يه -ئه‌ى موحه‌ممه‌د- وهه‌ما كارێ ته ئه‌وه تو په‌ياما خودێ بگه‌هينییه وان، ووان ژ عه‌زابا خودێ بترسينى. وبۆ هه‌ر ملله‌ته‌كى پێغه‌مبه‌ره‌ك هه‌يه به‌رێ وان دده‌ته خودێ.
اَللّٰهُ يَعْلَمُ مَا تَحْمِلُ كُلُّ اُنْثٰي وَمَا تَغِيْضُ الْاَرْحَامُ وَمَا تَزْدَادُ وَكُلُّ شَيْءٍ عِنْدَهٗ بِمِقْدَارٍ
خودايێ پاك وبلند دزانت كانێ هه‌ر مێیه‌ك چ تێشكى د زكێ خۆ دا هل دگرت، وكانێ ئه‌و يێ نێره يان يێ مێیه؟ يێ دلشاده يان يێ دل نه‌خۆشه؟ وئه‌و دزانت كانێ چ ژ مالبچويكان كێم دبت، دكه‌ڤت يان به‌رى نه‌هـ هه‌يڤییێ دچت، وكانێ چ تشتى هلگرتنا وى زێده دبت، وهه‌ر تشته‌ك ل نك خودێ يێ پيڤايه نه‌كێم دكه‌ت نه‌زێده.
عٰلِمُ الْغَيْبِ وَالشَّهَادَةِ الْكَبِيْرُ الْمُتَعَالِ
خودێ ب وى تشتى يێ زانايه يێ كو ل به‌رچاڤ نه‌بت، و ب وى تشتى ژى يێ ل به‌رچاڤ بت، يێ مه‌زنه د ناڤ وسالۆخه‌تێن خۆ دا، ب خۆ وشيان وپێڤه‌هاتنا خۆ ل سه‌ر هه‌مى چێكرییێن خۆ يێ بلنده.
سَوَآءٌ مِّنْكُمْ مَّنْ اَسَرَّ الْقَوْلَ وَمَنْ جَهَرَ بِهٖ وَمَنْ هُوَ مُسْتَخْفٍۣ بِالَّيْلِ وَسَارِبٌۣ بِالنَّهَارِ
ل نك وى وه‌كى يه‌كه ئه‌وێ گۆتنێ ڤه‌شێرت يان ئاشكه‌را بكه‌ت ژ هه‌وه، و ل نك وى وه‌كى يه‌كه يێ ل تارییا شه‌ڤێ ب دزى ڤه كاره‌كى بكه‌ت، يان ل ڕۆژێ ئاشكه‌را بكه‌ت.
لَهٗ مُعَقِّبٰتٌ مِّنْۣ بَيْنِ يَدَيْهِ وَمِنْ خَلْفِهٖ يَحْفَظُوْنَهٗ مِنْ اَمْرِ اللّٰهِ اِنَّ اللّٰهَ لَا يُغَيِّرُ مَا بِقَوْمٍ حَتّٰي يُغَيِّرُوْا مَا بِاَنْفُسِهِمْ وَاِذَا٘ اَرَادَ اللّٰهُ بِقَوْمٍ سُوْٓءًا فَلَا مَرَدَّ لَهٗ وَمَا لَهُمْ مِّنْ دُوْنِهٖ مِنْ وَّالٍ
خودێ هنده‌ك فريشته هه‌نه ل دويڤ يه‌ك ب سه‌ر مرۆڤى دا دئێن ل به‌ر ده‌ستێ وى و ل پشت وى، ئه‌و ب فه‌رمانا خودێ وى دپارێزن وكريارێن وى يێن باش وخراب دهژمێرن. هندى خودێ‌یه وێ قه‌نجییێ يا وى د گه‌ل ملله‌ته‌كى كرى ناگوهۆڕت حه‌تا ئه‌و وێ فه‌رمانێ نه‌گوهۆڕن يا ل وان هاتییه كرن. وئه‌گه‌ر خودێ نه‌خۆشییه‌ك بۆ كۆمه‌كێ ڤيا چو ڕه‌ڤ ژێ نابن، ووان ژبلی خودێ كه‌سه‌ك نابت ل وان ببته خودان، وێ بۆ وان بكه‌ت يا وان دڤێت، ووێ ژ وان دوير بكه‌ت يا وان نه‌ڤێت.
هُوَ الَّذِيْ يُرِيْكُمُ الْبَرْقَ خَوْفًا وَّطَمَعًا وَّيُنْشِئُ السَّحَابَ الثِّقَالَ
وئه‌وه يێ ژ نيشانێن خۆ برويسییێ نيشا هه‌وه دده‌ت، ڤێجا هوين دترسن كو ئاگره‌ك ژێ ب سه‌ر هه‌وه دا بێت هه‌وه بسۆژت، وهه‌وه دڤێت باران بۆ هه‌وه ژێ بێت، و ب شيانا وى عه‌ورێن ب ئاڤه‌كا بۆش دگران بۆ مفايێ هه‌وه چێ دبن.
وَيُسَبِّحُ الرَّعْدُ بِحَمْدِهٖ وَالْمَلٰٓئِكَةُ مِنْ خِيْفَتِهٖ وَيُرْسِلُ الصَّوَاعِقَ فَيُصِيْبُ بِهَا مَنْ يَّشَآءُ وَهُمْ يُجَادِلُوْنَ فِي اللّٰهِ وَهُوَ شَدِيْدُ الْمِحَالِ
وتۆپ وبرويسى ب سوپاسییا خودێ ته‌سبيحا وى دكه‌ن ته‌سبيحه‌كا هندێ دگه‌هينت كو ئه‌و بن ده‌ستى وينه، وفريشته ژ ترسا خودێ دا وى پاك وپيرۆز دكه‌ن، وخودێ برويسییان دهنێرت ڤێجا وى پێ تێ دبه‌ت يێ وى بڤێت ژ به‌نییێن خۆ، وكافر هه‌ڤڕكییێ د ده‌رحه‌قا سالۆخه‌ت وشيانا خودێ دا ل سه‌ر ڕاكرنا پشتى مرنێ دكه‌ن، وئه‌و يێ هێز وشيان وگرتن دژواره بۆ وى يێ گوهدارییا وى نه‌كه‌ت.
لَهٗ دَعْوَةُ الْحَقِّ وَالَّذِيْنَ يَدْعُوْنَ مِنْ دُوْنِهٖ لَا يَسْتَجِيْبُوْنَ لَهُمْ بِشَيْءٍ اِلَّا كَبَاسِطِ كَفَّيْهِ اِلَي الْمَآءِ لِيَبْلُغَ فَاهُ وَمَا هُوَ بِبَالِغِهٖ وَمَا دُعَآءُ الْكٰفِرِيْنَ اِلَّا فِيْ ضَلٰلٍ
گازییا ته‌وحيدێ (لا إله إلا الله) بۆ خودێ ب تنێ‌یه، دوعا وپه‌رستن ژ وى ب تنێ دئێته‌كرن، وئه‌و خوداوه‌ندێن ئه‌و ژبلی خودێ گازى دكه‌نێ به‌رسڤا وان يێن گازى دكه‌نێ ناده‌ن، وحالێ وان د گه‌ل خوداوه‌ندێن وان وه‌كى حالێ وى مرۆڤێ تێهنییه يێ ژ دوير ڤه ده‌ستێ خۆ بۆ ئاڤێ درێژ بكه‌ت؛ دا وێ بگه‌هينته ده‌ڤێ خۆ به‌لێ ئه‌و ناگه‌هتێ، وداخوازا كافران ژ وان خوداوه‌ندان گه‌له‌ك ژ ڕاستییێ يا دويره چونكى ئه‌و شريكان بۆ خودێ چێ دكه‌ن.
وَلِلّٰهِ يَسْجُدُ مَنْ فِي السَّمٰوٰتِ وَالْاَرْضِ طَوْعًا وَّكَرْهًا وَّظِلٰلُهُمْ بِالْغُدُوِّ وَالْاٰصَالِ
وهه‌ر تشته‌كێ ل عه‌سمانان وعه‌ردى خۆ ب ده‌ست خودێ ڤه به‌ردايه، ڤێجا خودان باوه‌ر ژ دل خۆ بۆ وى دچه‌مينن، وكافر ب كوته‌كى وێ چه‌ندێ دكه‌ن؛ چونكى ئه‌و خۆ ژ عه‌بدينییا خودێ بلندتر دبينن، وخوڕستییا وان وان دره‌وين ده‌رتێخت، وسيبه‌را چێكرییان خۆ ب ده‌ست وى ڤه به‌ردده‌ت، و ب فه‌رمانا وى ل سپێده وئێڤاران دلڤلڤت.
قُلْ مَنْ رَّبُّ السَّمٰوٰتِ وَالْاَرْضِ قُلِ اللّٰهُ قُلْ اَفَاتَّخَذْتُمْ مِّنْ دُوْنِهٖ٘ اَوْلِيَآءَ لَا يَمْلِكُوْنَ لِاَنْفُسِهِمْ نَفْعًا وَّلَا ضَرًّا قُلْ هَلْ يَسْتَوِي الْاَعْمٰي وَالْبَصِيْرُ اَمْ هَلْ تَسْتَوِي الظُّلُمٰتُ وَالنُّوْرُ اَمْ جَعَلُوْا لِلّٰهِ شُرَكَآءَ خَلَقُوْا كَخَلْقِهٖ فَتَشَابَهَ الْخَلْقُ عَلَيْهِمْ قُلِ اللّٰهُ خَالِقُ كُلِّ شَيْءٍ وَّهُوَ الْوَاحِدُ الْقَهَّارُ
تو بێژه: كییه ئافرانده‌رێ عه‌سمانان وعه‌ردى وڕێڤه‌به‌رێ وان؟ تو بێژه: خودێ‌یه، پاشى ژ بۆ نه‌هێلانا چو هێجه‌تان بۆ وان تو بێژه: ئه‌رێ هه‌وه -ژبلی وى- هنده‌ك خودايێن دى بۆ خۆ گرتينه، وئه‌و نه‌شێن چو مفاى يان زيانێ بگه‌هيننه خۆ حه‌تا بگه‌هيننه هه‌وه، وهه‌وه په‌رستنا خودايێ وان هێلايه؟ تو بێژه وان: ئه‌رێ ما ل نك هه‌وه مرۆڤێ كافر -ئه‌ڤێ وه‌كى كۆره‌ى- ويێ خودان باوه‌ر -كو وه‌كى يێ ب چاڤه- وه‌كى يه‌كن؟ يان ل نك هه‌وه كوفر -كو وه‌كى تارییانه- وباوه‌رى -كو ڕۆناهییه- وه‌كى يه‌كن؟ يان ئه‌و خودايێن وان بۆ خودێ كرينه هه‌ڤپشك ئافراندنه‌كا وه‌كى يا خودێ دكه‌ن، ڤێجا ئافراندنا وان هه‌ڤپشكان ل به‌ر وان تێكه‌لی ئافراندنا خودێ بوويه، ڤێجا وان هزركرییه كو ئه‌و خوداوه‌ند ژى هێژاى په‌رستنێنه؟ تو بێژه وان: خودێ‌یه ئافرانده‌رێ هه‌مى تشتان ژ چوننه‌يێ، وئه‌و ب تنێ‌یه يێ هێژاى په‌رستنێ، وئه‌وه يه‌كێ ب سه‌رڤه‌هاتى يێ هێژاى خوداينییێ وپه‌رستنێ.
اَنْزَلَ مِنَ السَّمَآءِ مَآءً فَسَالَتْ اَوْدِيَةٌۣ بِقَدَرِهَا فَاحْتَمَلَ السَّيْلُ زَبَدًا رَّابِيًا وَمِمَّا يُوْقِدُوْنَ عَلَيْهِ فِي النَّارِ ابْتِغَآءَ حِلْيَةٍ اَوْ مَتَاعٍ زَبَدٌ مِّثْلُهٗ كَذٰلِكَ يَضْرِبُ اللّٰهُ الْحَقَّ وَالْبَاطِلَ فَاَمَّا الزَّبَدُ فَيَذْهَبُ جُفَآءً وَاَمَّا مَا يَنْفَعُ النَّاسَ فَيَمْكُثُ فِي الْاَرْضِ كَذٰلِكَ يَضْرِبُ اللّٰهُ الْاَمْثَالَ
پاشى خودێ مه‌ته‌له‌ك ل سه‌ر حه‌قییێ ونه‌حه‌قییێ ئينا ب وێ ئاڤا وى ژ عه‌سمانى باراندى، ڤێجا نهالێن عه‌ردى پێ ڕابووين ل دويڤ بچويكى ومه‌زنییا وان، وله‌هییێ كه‌فه‌كا بلند وبێ مفا د گه‌ل خۆ هلگرت. ومه‌ته‌له‌كا دى ئينا: ب وان كه‌ره‌ستێن ئاگرى ل سه‌ر هل دكه‌نێ دا بحه‌لينن وبكه‌نه چه‌ك وه‌كى زێڕى وزيڤى، يان ژى دا مفايه‌كێ دى بۆ خۆ ژێ وه‌ربگرن وه‌كى سفرى، ڤێجا ئه‌و ده‌غه‌لێ بێ مفا وه‌كى وێ كه‌فا ب سه‌ر له‌هییێ كه‌فتى ژێ ده‌ردكه‌ڤت، ب ڤى ڕه‌نگى خودێ مه‌ته‌لا حه‌قه‌يێ ونه‌حه‌قییێ دئينت: ڤێجا نه‌حه‌قى وه‌كى كه‌فا ئاڤێ يه پويچ دبت ودچت؛ چونكى چو مفا تێدا نينه، وحه‌قى وه‌كى ئاڤا صافییه، ووه‌كى وى كه‌ره‌ستێ پاقژه ئه‌وێ بۆ مفا ژێ وه‌رگرتنێ ل عه‌ردى دمينت، ووه‌كى وى ئه‌ڤ مه‌ته‌له بۆ هه‌وه ئيناين، وه‌سا ئه‌و مه‌ته‌لان بۆ مرۆڤان دئينت؛ دا حه‌قى ونه‌حه‌قى پێ ژێك بێته ڤاڤارتن.
لِلَّذِيْنَ اسْتَجَابُوْا لِرَبِّهِمُ الْحُسْنٰي وَالَّذِيْنَ لَمْ يَسْتَجِيْبُوْا لَهٗ لَوْ اَنَّ لَهُمْ مَّا فِي الْاَرْضِ جَمِيْعًا وَّمِثْلَهٗ مَعَهٗ لَافْتَدَوْا بِهٖ اُولٰٓئِكَ لَهُمْ سُوْٓءُ الْحِسَابِ وَمَاْوٰىهُمْ جَهَنَّمُ وَبِئْسَ الْمِهَادُ
بۆ وان خودان باوه‌رێن گوهدارییا خودێ وپێغه‌مبه‌رێ وى كرى به‌حه‌شت هه‌يه، وبۆ ئه‌وێن گوهدارییا وان نه‌كرى وكافربووين ئاگر هه‌يه، وئه‌گه‌ر هه‌ر تشته‌كێ ل عه‌ردى هه‌ى وهندى وى ژى د گه‌ل دا يێ وان با ئه‌و دا وى هه‌مییێ ده‌ن به‌س دا بشێن خۆ پێ ژ عه‌زابا خودێ ل ڕۆژا قيامه‌تێ بــكــڕن، وئــــه‌و ژ وان نائــێــتــه قه‌بويلكرن، حسيبا هه‌ر كاره‌كێ خراب يێ وان كرى دێ د گه‌ل وان ئێته‌كرن، ووارێ وان دێ جه‌هنه‌م بت ئه‌و دێ بۆ وان بته جهـ، وئه‌و پيسه جهه وان بۆ خۆ ڕائێخستى.
اَفَمَنْ يَّعْلَمُ اَنَّمَا٘ اُنْزِلَ اِلَيْكَ مِنْ رَّبِّكَ الْحَقُّ كَمَنْ هُوَ اَعْمٰي اِنَّمَا يَتَذَكَّرُ اُولُوا الْاَلْبَابِ
ئه‌رێ ما ئه‌وێ دزانت كو ئه‌وا بۆ ته -ئه‌ى موحه‌ممه‌د- ژ نك خودێ هاتییه خوارێ ڕاستییه وباوه‌رییێ پێ دئينت، وه‌كى وى كۆره‌يه يێ حه‌قییێ نه‌بينت وباوه‌رییێ پێ نه‌ئينت؟ هه‌ما خودان عه‌قلێن دورست مفاى بۆ خۆ ژێ دبينن.
الَّذِيْنَ يُوْفُوْنَ بِعَهْدِ اللّٰهِ وَلَا يَنْقُضُوْنَ الْمِيْثَاقَ
ئه‌وێن وێ په‌يمانا خودێ پێك دئينن يا وى فه‌رمان پێ ل وان كرى، وئه‌و وێ په‌يمانا موكم يا وان دايه خودێ ناشكێنن.
وَالَّذِيْنَ يَصِلُوْنَ مَا٘ اَمَرَ اللّٰهُ بِهٖ٘ اَنْ يُّوْصَلَ وَيَخْشَوْنَ رَبَّهُمْ وَيَخَافُوْنَ سُوْٓءَ الْحِسَابِ
وئه‌و ئه‌ون يێن وى تشتێ خودێ فه‌رمان ب گه‌هاندنا وى كرى وه‌كى مرۆڤاينییێ وهاريكارییا پێتڤییان دگه‌هينن، وبه‌رێ وان يێ ل خودێ، و ژ هندێ دترسن كو خودێ حسێبێ سه‌را گونه‌هان د گه‌ل وان بكه‌ت، وتشته‌كى ژ وان گونه‌هان بۆ وان ژێ نه‌به‌ت.
وَالَّذِيْنَ صَبَرُوا ابْتِغَآءَ وَجْهِ رَبِّهِمْ وَاَقَامُوا الصَّلٰوةَ وَاَنْفَقُوْا مِمَّا رَزَقْنٰهُمْ سِرًّا وَّعَلَانِيَةً وَّيَدْرَءُوْنَ بِالْحَسَنَةِ السَّيِّئَةَ اُولٰٓئِكَ لَهُمْ عُقْبَي الدَّارِ
وئه‌و ئه‌ون يێن پێخه‌مه‌ت ڕازيبوونا خودێ صه‌بر ل سه‌ر نه‌خۆشییێ وگوهدارییا وى كێشاى، ونڤێژ ب ڕه‌نگه‌كێ تمام پێك ئيناى، وزه‌كاتا مالێ خۆ يا فه‌ر داى، وئاشكه‌را وڤه‌شارتى خێر ژێ داين، و ب باشییێ خرابییێ پاشڤه لێ دده‌ن دا ژێ ببه‌ت، ئه‌وێن ب ڤـان سـالۆخـه‌تان دويماهییا باش ل ئاخره‌تێ بۆ وانه.
جَنّٰتُ عَدْنٍ يَّدْخُلُوْنَهَا وَمَنْ صَلَحَ مِنْ اٰبَآئِهِمْ وَاَزْوَاجِهِمْ وَذُرِّيّٰتِهِمْ وَالْمَلٰٓئِكَةُ يَدْخُلُوْنَ عَلَيْهِمْ مِّنْ كُلِّ بَابٍ
ئه‌و دويماهییا هه به‌حه‌شتێن عه‌دنن ئه‌و هه‌ر دێ لێ مينن وژێ ده‌رناكه‌ڤن، ئه‌و و د گه‌ل وان دا هه‌چییێ چاك ژ باب وژن ودوونده‌هێن وان ژ نێر ومێیان، وفريشته د هه‌مى ده‌رگه‌هان ڕا ب سه‌ر وان ڤه دئێنه ژۆر؛ دا پيرۆزباهییێ ل وان بكه‌ن كو ئه‌و هاتينه به‌حه‌شتێ.
سَلٰمٌ عَلَيْكُمْ بِمَا صَبَرْتُمْ فَنِعْمَ عُقْبَي الدَّارِ
فريشته دبێژنه وان: ژ به‌ر صه‌برا هه‌وه كێشاى ل سه‌ر گوهدارییا خودێ هوين ژ هه‌ر نه‌خۆشییه‌كێ ب سلامه‌تى بن، ڤێجا به‌حه‌شت چ خۆش خانییێ دويماهییێ يه.
وَالَّذِيْنَ يَنْقُضُوْنَ عَهْدَ اللّٰهِ مِنْۣ بَعْدِ مِيْثَاقِهٖ وَيَقْطَعُوْنَ مَا٘ اَمَرَ اللّٰهُ بِهٖ٘ اَنْ يُّوْصَلَ وَيُفْسِدُوْنَ فِي الْاَرْضِ اُولٰٓئِكَ لَهُمُ اللَّعْنَةُ وَلَهُمْ سُوْٓءُ الدَّارِ
به‌لێ ئه‌و به‌خت ڕه‌شێن سالۆخه‌تێن وان دژى سالۆخه‌تێن خودان باوه‌ران، ئه‌و ئه‌ون يێن په‌يمانا خودێ ب جهـ نائينن كو په‌رستنا وى ب تنێ بكه‌ن پشتى وان ئه‌و په‌يمان ل سه‌ر خۆ به‌ستى ژى، وئه‌و ئه‌ون يێن وى تشتى دبڕن يێ خودێ فه‌رمان ب گه‌هاندنا وى داى، و ب كرنا گونه‌هان خرابكارییێ د عه‌ردى دا دكه‌ن، ئه‌ڤه ئه‌وێن ئه‌ڤ سالۆخه‌تێن كرێت ل نك هه‌ين دويركه‌فتنا ژ ڕه‌حما خودێ بۆ وان هه‌يه، و ل ئاخره‌تێ ئه‌و عه‌زابا وان پێ نه‌خۆش بۆ وان هه‌يه.
اَللّٰهُ يَبْسُطُ الرِّزْقَ لِمَنْ يَّشَآءُ وَيَقْدِرُ وَفَرِحُوْا بِالْحَيٰوةِ الدُّنْيَا وَمَا الْحَيٰوةُ الدُّنْيَا فِي الْاٰخِرَةِ اِلَّا مَتَاعٌ
خودێ ب تنێ‌یه ڕزقى بۆ وى يێ وى بڤێت ژ به‌نییێن خۆ به‌رفره‌هـ دكه‌ت، و ل سه‌ر وى به‌رته‌نگ دكه‌ت يێ وى بڤێت، وكافران كه‌يف ب به‌رفره‌هییا د ژينا دنيايێ دا دئێت، وئه‌ڤ ژينا دنيايێ به‌رانبه‌ر ئاخره‌تێ خۆشییه‌كا كێم وبه‌روه‌خته، دێ چت ونامينت.
وَيَقُوْلُ الَّذِيْنَ كَفَرُوْا لَوْلَا٘ اُنْزِلَ عَلَيْهِ اٰيَةٌ مِّنْ رَّبِّهٖ قُلْ اِنَّ اللّٰهَ يُضِلُّ مَنْ يَّشَآءُ وَيَهْدِيْ٘ اِلَيْهِ مَنْ اَنَابَ
وكافر ژ ڕكدارى دبێژن: پا دێ بلا موعجزه‌يه‌كا به‌رچاڤ يا وه‌كى موعجزه‌يا مووساى وعيساى بۆ موحه‌ممه‌دى هاتبا خوارێ. تو بێژه وان: هندى خودێ‌یه يێ وى بڤێت ژ ڕكداران ژ ڕێكا هيدايه‌تێ به‌رزه دكه‌ت ڤێجا موعجزه چو مفاى ناگه‌هيننه وى، وبه‌رێ وى دده‌ته دينێ خۆ يێ حه‌ق يێ ل وى بزڤڕت وداخوازا ڕازيبوونا وى بكه‌ت.
اَلَّذِيْنَ اٰمَنُوْا وَتَطْمَئِنُّ قُلُوْبُهُمْ بِذِكْرِ اللّٰهِ اَلَا بِذِكْرِ اللّٰهِ تَطْمَئِنُّ الْقُلُوْبُ
وئه‌و به‌رێ وان دده‌ته هيدايه‌تێ ئه‌وێن دلێن وان ب ته‌وحيدا خودێ وزكرێ وى ته‌نا وڕحه‌ت دبن، نێ ب گوهدان وزكرێ خودێ دل ته‌نا وڕحه‌ت دبن.
اَلَّذِيْنَ اٰمَنُوْا وَعَمِلُوا الصّٰلِحٰتِ طُوْبٰي لَهُمْ وَحُسْنُ مَاٰبٍ
ئه‌وێن باوه‌رى ب خودێ وپێغه‌مبه‌رێ وى ئيناى، وكريارێن چاك كرين خۆشى وچاڤ ڕوهنى، وحاله‌كێ باش، ودويماهى ولێ زڤڕينه‌كا تازه ل به‌حه‌شتێ د ڕازيبوونا خودێ دا بۆ وان هه‌يه.
كَذٰلِكَ اَرْسَلْنٰكَ فِيْ٘ اُمَّةٍ قَدْ خَلَتْ مِنْ قَبْلِهَا٘ اُمَمٌ لِّتَتْلُوَا۠ عَلَيْهِمُ الَّذِيْ٘ اَوْحَيْنَا٘ اِلَيْكَ وَهُمْ يَكْفُرُوْنَ بِالرَّحْمٰنِ قُلْ هُوَ رَبِّيْ لَا٘ اِلٰهَ اِلَّا هُوَ عَلَيْهِ تَوَكَّلْتُ وَاِلَيْهِ مَتَابِ
وه‌كى مه به‌رى ته -ئه‌ى موحه‌ممه‌د- پێغه‌مبه‌ر هنارتين وه‌سا مه تو ژى د ناڤ ملله‌ته‌كى دا هنارتى به‌رى وان گه‌له‌ك ملله‌تێن پێغه‌مبه‌ران بۆرينه؛ دا تو بۆ ڤى ملله‌تى وێ قورئانێ يا بۆ ته هاتییه خوارێ بخوينى، وحالێ ملله‌تى ئه‌وه ئه‌و كافرییێ ب يه‌كينییا خودايێ ره‌حمان دكه‌ن، تو -ئه‌ى موحه‌ممه‌د- بێژه وان: خودايێ ره‌حـمان ئه‌وێ هوين باوه‌رییێ ب يه‌كينییا وى نائينن خودايێ منه، ژ وى پێڤه‌تر چو خودا يێن ب حه‌ق نينن په‌رستن بۆ بێته‌كرن، من خۆ هێلايه ب هيڤییا وى ڤه، وزڤڕينا من بۆ نك وى يه.
وَلَوْ اَنَّ قُرْاٰنًا سُيِّرَتْ بِهِ الْجِبَالُ اَوْ قُطِّعَتْ بِهِ الْاَرْضُ اَوْ كُلِّمَ بِهِ الْمَوْتٰي بَلْ لِّلّٰهِ الْاَمْرُ جَمِيْعًا اَفَلَمْ يَايْــَٔسِ الَّذِيْنَ اٰمَنُوْ٘ا اَنْ لَّوْ يَشَآءُ اللّٰهُ لَهَدَي النَّاسَ جَمِيْعًا وَلَا يَزَالُ الَّذِيْنَ كَفَرُوْا تُصِيْبُهُمْ بِمَا صَنَعُوْا قَارِعَةٌ اَوْ تَحُلُّ قَرِيْبًا مِّنْ دَارِهِمْ حَتّٰي يَاْتِيَ وَعْدُ اللّٰهِ اِنَّ اللّٰهَ لَا يُخْلِفُ الْمِيْعَادَ
خودايێ مه‌زن به‌رسڤا وان كافران دده‌ت ئه‌وێن داخوازا هاتــنــا هــنـده‌ك موعجزه‌يێن به‌رچاڤ بۆ پێغه‌مبه‌رى -سلاڤ لێ بن- كرى ودبێژته وان: وئه‌گه‌ر قورئانه‌ك هه‌با هاتبا خواندن، ڤێجا چيا پێ ژ جهێن خۆ هاتبانه ڕاكرن، يان عه‌رد پێ هاتبا شه‌قكرن وڕويبار ژێ ده‌ركه‌فتبان، يان مرى پێ هاتبانه زێنديكرن وئاخافتن، ئه‌و قورئانا وه‌سا دا ئه‌ڤ قورئانه بت، ووان باوه‌رى پێ نه‌دئينا. به‌لكى كار وفه‌رمان د هاتنا موعجزه‌يان دا و د هه‌ر تشته‌كێ دى دا بۆ خودێ ب تنێ‌یه. ئه‌رێ ڤێجا ما خودان باوه‌ران نه‌زانییه كو ئه‌گه‌ر خودێ ڤيابا دا خه‌لكێ عه‌ردى هه‌مى بێى موعجزه ژى باوه‌رییێ ئينن؟ وكافر هه‌ر دێ مينن -ژ به‌ر كوفرا وان- نه‌خۆشى وگرفتارییێن وه‌كى كوشتنێ وئێخسيركرنێ دێ ب سه‌ر وان دا ئێن، يان ئه‌و نه‌خۆشى وگرفتارى دێ كه‌ڤنه نێزيكى خانییێن وان، حه‌تا سۆزا خودێ ب سه‌ركه‌فتنا ل سه‌ر وان دئێت، هندى خودێ‌یه ژ سۆزێ لێڤه نابت.
وَلَقَدِ اسْتُهْزِئَ بِرُسُلٍ مِّنْ قَبْلِكَ فَاَمْلَيْتُ لِلَّذِيْنَ كَفَرُوْا ثُمَّ اَخَذْتُهُمْ فَكَيْفَ كَانَ عِقَابِ
وئه‌گه‌ر وان يارى بۆ خۆ ب گازییا ته كربن -ئه‌ى موحه‌ممه‌د- ب ڕاستى ملله‌تێن به‌رى ته ژى يارى بۆ خۆ ب پێغه‌مبه‌رێن خۆ كربوون، ڤێجا تو ب خه‌م نه‌كه‌ڤه من ل دويڤ كافران به‌ردابوو پاشى من ئه‌و ب عه‌زابا خۆ گرتن، وئه‌و عه‌زابه‌كا دژوار بوو.
اَفَمَنْ هُوَ قَآئِمٌ عَلٰي كُلِّ نَفْسٍۣ بِمَا كَسَبَتْ وَجَعَلُوْا لِلّٰهِ شُرَكَآءَ قُلْ سَمُّوْهُمْ اَمْ تُنَبِّــُٔوْنَهٗ بِمَا لَا يَعْلَمُ فِي الْاَرْضِ اَمْ بِظَاهِرٍ مِّنَ الْقَوْلِ بَلْ زُيِّنَ لِلَّذِيْنَ كَفَرُوْا مَكْرُهُمْ وَصُدُّوْا عَنِ السَّبِيْلِ وَمَنْ يُّضْلِلِ اللّٰهُ فَمَا لَهٗ مِنْ هَادٍ
ئه‌رێ ڤێجا ما ئه‌وێ ل سه‌ر هه‌ر نه‌فسه‌كێ پێ ڕابووى بت وكريارێن وێ بهژمێرت، ئه‌و هێژاتره بێته په‌رستن، يان ئه‌ڤ چێكرییێن بێزار؟ ووان -ژ نه‌زانينا خۆ- هنده‌ك هه‌ڤپشك بۆ خودێ ژ چێكرییێن وى دانان په‌رستن بۆ كر، تو -ئه‌ى موحه‌ممه‌د- بێژه وان: هوين ناڤ وسالۆخه‌تێن وان بێژن، وئه‌و تشته‌كى ژ سالۆخه‌تێن وان نابێژن كو ئه‌و پێ هێژاى په‌رستنێ ببن، يان هوين به‌حسێ هنده‌ك هه‌ڤپشكان بۆ خودێ د عه‌ردێ وى دا دكه‌ن ئه‌و پێ ناحه‌ست، يان هوين ب په‌يڤێن سه‌رڤه سه‌رڤه بێى كو ڕاستییه‌ك بۆ هه‌بت وان دكه‌نه هه‌ڤپشك. به‌لكى شه‌يتانى ل به‌ر كافران گۆتنا وان يا نه‌حه‌ق وپاشڤه‌لێدانا وان ژ ڕێكا خودێ خه‌ملاند. وهه‌چییێ خودێ به‌رێ وى نه‌ده‌ته هيدايه‌تا خۆ وى كه‌س نابت به‌رێ وى بده‌ته حه‌قییێ وسه‌رڕاستییێ.
لَهُمْ عَذَابٌ فِي الْحَيٰوةِ الدُّنْيَا وَلَعَذَابُ الْاٰخِرَةِ اَشَقُّ وَمَا لَهُمْ مِّنَ اللّٰهِ مِنْ وَّاقٍ
بۆ ڤان كافران ئه‌وێن به‌رێ خه‌لكى ژ ڕێكا خودێ دده‌نه پاش د ژينا دنيايێ دا عه‌زابه‌كا ب زه‌حمه‌ت ب كوشتنێ وگرتنێ وشه‌رمزارییێ هه‌يه، وعه‌زابا ئاخره‌تێ گرانتر ودژوارتره، ووان كه‌س نابت عه‌زابا خودێ ژ وان پاشڤه لێ بده‌ت.
مَثَلُ الْجَنَّةِ الَّتِيْ وُعِدَ الْمُتَّقُوْنَ تَجْرِيْ مِنْ تَحْتِهَا الْاَنْهٰرُ اُكُلُهَا دَآئِمٌ وَّظِلُّهَا تِلْكَ عُقْبَي الَّذِيْنَ اتَّقَوْا وَّعُقْبَي الْكٰفِرِيْنَ النَّارُ
سالۆخه‌تێ وێ به‌حه‌شتێ ئه‌ڤه‌يه: ڕويبار د بن داروبار وقه‌سرێن وێ دا دچن، فێقییێ وێ خلاس نابت، وسيبه‌را وێ نه‌كێم دبت ونه‌دچت، ئه‌ڤ جزادانا ب به‌حه‌شتێ دويماهییا وانه يێن ژ خودێ دترسن، ڤێجا هوين خۆ ژ بێ ئه‌مرییا وى بده‌نه پاش وفه‌رمانێن وى ب جهـ بينن، ودويماهییا كافران ئاگره.
وَالَّذِيْنَ اٰتَيْنٰهُمُ الْكِتٰبَ يَفْرَحُوْنَ بِمَا٘ اُنْزِلَ اِلَيْكَ وَمِنَ الْاَحْزَابِ مَنْ يُّنْكِرُ بَعْضَهٗ قُلْ اِنَّمَا٘ اُمِرْتُ اَنْ اَعْبُدَ اللّٰهَ وَلَا٘ اُشْرِكَ بِهٖ اِلَيْهِ اَدْعُوْا وَاِلَيْهِ مَاٰبِ
وئه‌وێن مه كيتاب دايێ ژ جوهى وفه‌لان هه‌چییێ باوه‌رى ب ته ئيناى وه‌كى عه‌بدللاهێ كوڕێ سه‌لامى ونه‌جاشى، ئه‌و مزگينییێ ب وێ قورئانا بۆ ته هاتییه خوارێ دده‌نه يه‌ك ودو؛ چونكى ئه‌و يا ڕێككه‌فتییه د گه‌ل وێ يا ل نك وان، و ژ وان يێن ل سه‌ر كوفرێ ودژينییا ته كۆمبووين، وه‌كى سه‌ييدى وعاقبى قه‌شێن نه‌جرانێ، وكه‌عبێ كوڕێ ئه‌شره‌فى، هنده‌ك هه‌نه باوه‌رییێ ب هنده‌كێ ژ وێ نائينن يا بۆ ته هاتى، تو بێژه وان: هه‌ما خودێ فه‌رمان يا ل من كرى كو ئه‌ز عه‌بدينییا وى ب تنێ بكه‌م، وچو هه‌ڤپشكان بۆ وى چێ نه‌كه‌م، ئه‌ز به‌رێ خه‌لكى دده‌مه عيباده‌تێ وى، وزڤڕينا من بۆ نك وییه.
وَكَذٰلِكَ اَنْزَلْنٰهُ حُكْمًا عَرَبِيًّا وَلَئِنِ اتَّبَعْتَ اَهْوَآءَهُمْ بَعْدَ مَا جَآءَكَ مِنَ الْعِلْمِ مَا لَكَ مِنَ اللّٰهِ مِنْ وَّلِيٍّ وَّلَا وَاقٍ
وكانێ چاوا مه كيتاب بۆ پێغه‌مبه‌ران ب ئه‌زمانێ وان هنارتينه وه‌سا مه قورئان ب ئه‌زمانێ عه‌ره‌بان بۆ ته ژى ئينا خوارێ؛ دا تو حوكمى پێ بكه‌ى، وئه‌گه‌ر تو د په‌رستنا يه‌كێ دى دا ژبلی خودێ ب دويڤ دلچوونێن كافران بكه‌ڤى -پشتى وێ حه‌قییا بۆ ته ژ نك خودێ هاتى- ته چو سه‌ركار وپشته‌ڤان نابن ته ب سه‌ربێخن و ژ عه‌زابا خودێ بپارێزن.
وَلَقَدْ اَرْسَلْنَا رُسُلًا مِّنْ قَبْلِكَ وَجَعَلْنَا لَهُمْ اَزْوَاجًا وَّذُرِّيَّةً وَمَا كَانَ لِرَسُوْلٍ اَنْ يَّاْتِيَ بِاٰيَةٍ اِلَّا بِاِذْنِ اللّٰهِ لِكُلِّ اَجَلٍ كِتَابٌ
وئه‌گه‌ر وان گۆت: ته چيه تو ژنان دئينى؟ ب ڕاستى مه به‌رى ته هنده‌ك پێغه‌مبه‌ر ژ مرۆڤان هنارتينه ومه ژن ودوونده‌هـ داينه وان، وئه‌گه‌ر وان گۆت: ئه‌گه‌ر ئه‌و پێغه‌مبه‌ر با دا وان موعجزه‌يان ئينت يێن مه ژێ خواستين، نه‌دشيانا پێغه‌مبه‌ره‌كى دايه كو بێى ده‌ستويرییا خودێ ئه‌و موعجزه‌يه‌كێ بۆ ملله‌تێ خۆ بينت. بۆ هه‌ر كاره‌كێ حه‌زكرى نڤيسينه‌ك وده‌مه‌ك هه‌يه خودێ ل نك خۆ نڤيسییه، نه‌پێش دكه‌ڤت ونه‌پاش دكه‌ڤت.
يَمْحُوا اللّٰهُ مَا يَشَآءُ وَيُثْبِتُ وَعِنْدَهٗ٘ اُمُّ الْكِتٰبِ
تشتێ خودێ بڤێت ژ حوكمان وهه‌ر تشته‌كێ دى ئه‌و ژێ دبه‌ت، وتشتێ وى بڤێت ئه‌و دهێلت ل دويڤ حكمه‌ته‌كا ئه‌و پێ دزانت، وماكا نڤيسينان كو له‌وحێ پاراستییه ل نك وییه.
وَاِنْ مَّا نُرِيَنَّكَ بَعْضَ الَّذِيْ نَعِدُهُمْ اَوْ نَتَوَفَّيَنَّكَ فَاِنَّمَا عَلَيْكَ الْبَلٰغُ وَعَلَيْنَا الْحِسَابُ
وئه‌گه‌ر هنده‌كێ ژ وێ عه‌زابێ يا مه گه‌ف پێ ل نه‌يارێن ته كرى ئه‌م د دنيايێ دا نيشا ته بده‌ين ئه‌و ئه‌وه يا بۆ وان هاتییه پێشخستن، وئه‌گه‌ر به‌رى تو وێ چه‌ندێ ببينى ئه‌م ته بمرينين، هه‌ما گه‌هاندنا ئيسلامێ ل سه‌ر ته‌يه، وحسێب وجزادان ل سه‌ر مه‌يه.
اَوَلَمْ يَرَوْا اَنَّا نَاْتِي الْاَرْضَ نَنْقُصُهَا مِنْ اَطْرَافِهَا وَاللّٰهُ يَحْكُمُ لَا مُعَقِّبَ لِحُكْمِهٖ وَهُوَ سَرِيْعُ الْحِسَابِ
ئه‌رێ ما ئه‌ڤ كافره نابينن كو ئه‌م يێن دئێين عه‌ردى ژ ره‌خان ڤه كێم دكه‌ين، كو موسلمان وه‌لاتێ شركێ ڤه‌دكه‌ن و ب سه‌ر وه‌لاتێ ئيسلامێ ڤه به‌ردده‌ن؟ وخودێ‌یه حوكمى دكه‌ت وكه‌س نينه حوكمه‌كێ دى د سه‌ر حوكمێ وى ڕا بكه‌ت، وئه‌و يێ حسێب سڤكه.
وَقَدْ مَكَرَ الَّذِيْنَ مِنْ قَبْلِهِمْ فَلِلّٰهِ الْمَكْرُ جَمِيْعًا يَعْلَمُ مَا تَكْسِبُ كُلُّ نَفْسٍ وَسَيَعْلَمُ الْكُفّٰرُ لِمَنْ عُقْبَي الدَّارِ
و ب ڕاستى ئه‌وێن به‌رى وان پيلان بۆ پێغه‌مبه‌رێن خۆ گێڕابوون، وگێڕانا هه‌مى پيلانان بۆ خودێ ب تنێ‌یه، ئه‌وه پيلانێن وان پويچ دكه‌ت، خودێ دزانت كانێ هه‌ر نه‌فسه‌ك چ باشییێ يان خرابییێ دكه‌ت وئه‌و دێ وێ سه‌را جزاده‌ت. وكافر پاشى دێ زانن -ده‌مێ ئه‌و دئێنه نك خودايێ خۆ- كانێ دويماهییا باش پشتى ڤێ دنيايێ بۆ كییه؟
وَيَقُوْلُ الَّذِيْنَ كَفَرُوْا لَسْتَ مُرْسَلًا قُلْ كَفٰي بِاللّٰهِ شَهِيْدًاۣ بَيْنِيْ وَبَيْنَكُمْ وَمَنْ عِنْدَهٗ عِلْمُ الْكِتٰبِ
وئه‌وێن كافر بووين دبێژن: ئه‌ى موحه‌ممه‌د خودێ تو نه‌كرییه پێغه‌مبه‌ر، تو بێژه وان: خودێ به‌سه شاهد بت ل سه‌ر ڕاستگۆيییا من ودره‌وينییا هه‌وه، وشاهدییا وان به‌سه يێن زانينا كيتابێ ل نك هه‌ى ژ وان جوهى وفه‌لان يێن باوه‌رى ب پێغه‌مبه‌رينییا من ئيناى، و باوه‌رى ب وێ ئيناى يا ژ نك خودێ هاتى، ودويكه‌فتنا حه‌قییێ كرى وشاهدییا خۆ ئاشكه‌را كرى ونه‌ڤه‌شارتى.