بِسْمِ اللّٰهِ الرَّحْمٰنِ الرَّحِيْمِ
ب ناڤێ ئه‌للاهى ئه‌ز ده‌ست پێ دكه‌م، دا ئه‌و هاريكارییا من ل سه‌ر خواندنێ بكه‌ت وێ ژ من قه‌بویل بكه‌ت، (ئه‌للاهـ) ناڤێ خودايێ پاك وبلنده، يێ كو په‌رستن بۆ وى ب تنێ دئێته كرن، وئه‌ڤه تايبه‌تترين ناڤه ژ ناڤێن وى، وژبلى وى ئه‌و ل سه‌ر كه‌سێ دى نائێته دانان. (الرحمن) يێ دلۆڤانییا وى هه‌مى مرۆڤ ڤه‌گرتين، (الرحيم) يێ دلۆڤانكار ب خودان باوه‌ران، وئه‌ڤ هه‌ردو ناڤه ژى ژ باشناڤێن خودێنه.
اَلْحَمْدُ لِلّٰهِ رَبِّ الْعٰلَمِيْنَ
ئه‌ڤه مه‌دحه‌كه خودێ بۆ خۆ كرى، هه‌ر وه‌سا فه‌رمانه‌كه ل به‌نییان ژى كو ئه‌و مه‌دحێن وى پێ بكه‌ن؛ چونكى ئه‌و ب تنێ هێژايى هندێ يه، وئه‌وه يێ مرۆڤ چێكرين، و ب كارێ وان ڕادبت، يێ ب قه‌نجییا خۆ هه‌مى به‌نییێن خۆ ب خودان دكه‌ت.
الرَّحْمٰنِ الرَّحِيْمِ
(الرحمن) يێ دلۆڤانییا وى هه‌مى مرۆڤ ڤه‌گرتين، (الرحيم) يێ دلۆڤانكار ب خودان باوه‌ران، وئه‌و هه‌ردو ناڤه ژ باشناڤێن خودێنه.
مٰلِكِ يَوْمِ الدِّيْنِ
وئه‌و ب تنێ خودانێ ڕۆژا جزادانێ ودان وستاندنێ يه، وگرێدانا خوداینییێ ب ڕۆژا جزادانێ ڤه ژ به‌ر هندێ يه چونكى كه‌سه‌ك هنگى نابێژت تشته‌ك يێ منه، وبێ ده‌ستويرییا خودێ كه‌سه‌ك نائاخڤت. وخواندنا موسلمانى بۆ ڤێ ئايه‌تێ هه‌ر ڕۆژ د هه‌مى ركاعه‌تێن نڤێژێ دا بيرئينانه‌كه بۆ وى ل ڕۆژا دويماهییێ، وپالڤه‌دانه‌كه بۆ وى ل سه‌ر كرنا كارێ چاك، وخۆدویركرنا ژ گونه‌هـ وخرابییان.
اِيَّاكَ نَعْبُدُ وَاِيَّاكَ نَسْتَعِيْنُ
ئه‌م گوهدارییا ته ب تنێ دكه‌ين وته دپه‌رێسين، وئه‌م د هه‌مى كارێن خۆ دا داخوازا هاريكارییێ ژ ته ب تنێ دكه‌ين؛ چونكى كار هه‌مى د ده‌ستێ ته دانه، وكه‌سێ تشته‌ك ژێ د ده‌ست دا نينه. و د ڤێ ئايه‌تێ دا نيشانه‌ك ل سه‌ر هندێ هه‌يه كو چێ نابت عه‌بد تشته‌كى ژ په‌رستنێ بۆ يه‌كێ دى ژبلى خودێ پێشكێش بكه‌ت، وده‌رمان ژى بۆ دلان تێدا هه‌يه كو ژبلى خودێ خۆ ب تشته‌كى ڤه گرێ نه‌ده‌ت، يان تووشى نه‌خۆشییا ريمه‌تییێ وخۆمه‌زنكرنێ نه‌بت.
اِهْدِنَا الصِّرَاطَ الْمُسْتَقِيْمَ
تو به‌رێ مه بده ڕێكا ڕاست، ومه ل سه‌ر موكم بكه هه‌تا ئه‌م دگه‌هينه ته، ڕێكا ڕاست كو ئيسلامه ئه‌و ڕێكا ئاشكه‌را يا مرۆڤى دگه‌هينته ڕازيبوونا خودێ وبه‌حه‌شتا وى، ئه‌وا پێغه‌مبه‌رێ وى يێ دويماهییێ موحه‌ممه‌دى سلاڤ لێ بن به‌رێ مه دايێ؛ چونكى مرۆڤى ڕییه‌كا دلخۆشییێ نينه ژبلى كو ڕاست به‌رێ خۆ بده‌ته ڤێ ڕێكێ.
صِرَاطَ الَّذِيْنَ اَنْعَمْتَ عَلَيْهِمْ غَيْرِ الْمَغْضُوْبِ عَلَيْهِمْ وَلَا الضَّآلِّيْنَ
ڕێكا وان يێن ته قه‌نجى د گه‌ل كرى ژ پێغه‌مبه‌ر وڕاستگۆ وشه‌هيد وچاكان؛ چونكى خودانێن هيدايه‌تێ هه‌ر ئـه‌ون وتو مه نـه‌كـه ژ وان يێن غه‌زه‌ب لێ هاتییه كرن، ئه‌وێن ڕاستى زانى وكار پێ نه‌كرى، كو جوهينه، وهه‌چییێ وه‌كى وان بت، ويێن به‌رزه‌بوويى، وئه‌و ئه‌ون يێن ڕێ نه‌نیاسى، ڤێجا ڕێ ل به‌ر خۆ به‌رزه‌كرى، وئه‌و فه‌له‌نه، وهه‌چییێ دويكه‌فتنا ڕێكا وان كرى. ويا باشه بۆ خوانده‌ڤانى كو پشتى خواندنا فاتحێ ئه‌و بێژت: (آمين)، وڕامانا وێ ئه‌ڤه‌يه: ئه‌ى خودا تو د به‌رسڤا مه وه‌ره، وئه‌ڤ په‌يڤه ب گۆتنا هه‌مى زانايان نه ئايه‌ته‌كه ژ سووره‌تا فاتحێ، ژ به‌ر ڤێ چه‌ندێ ئه‌و هه‌مى ل سه‌ر وێ يه‌كێ كۆم بووينه كو وێ د قورئانێ دا نه‌نڤيسن.